Het begós allemaol in 1955. Vastelaoves Zunjig sjpeeltj het besjtuur van de voetbalklup eine verklèdje wedsjtrijd taege de EHBO. Zaoterdig-aovendj kumptj het besjtuur van de voetbalklup nog aeve biejein bie kefee ‘Linssen’ óm ein en anger te besjpraeke. Emes oppertj; ‘Wae móste eigelik eine Prins en eine raod van èllef höbbe!’ Eine Prins is gauw gevónje, det mós Ton Beule waere. Hae hooftj allein nog mer jao te zègke. Det duit Ton. De raod van èllef is auch sjnel gevónje, det waerdj ’t besjtuur van de voetbalklup, aangevöldj mit ein paar toevallig aan het buffet zittendje supporters. Noe nog geldj en passendje kleijer vinje. Geldj is gein probleem. De beerbroewer en kasteleins zeen d’r waal get in. Moeilikker is het óm aan de kleijer te kómme. Oeteindelik kómme ze biej ‘Schillings’ in Hulsberg terecht, woea ze ein prinsepak en 11 mantjels kinne kriege. Gebroekdje aafdankertjes mer baeter den niks. Dao mót natuurlijk auch eine optocht kómme, want waat is eine Vastelaovendj zónger optocht? Besjlaote waerdj óm in eine optocht nao het voetbalveldj te trèkke ónger begeleijing van minimaal ein tróm. En eederein moog aansjloete. Het waer is zoea sjlecht (väöl sjnië) det de voetbalwedsjtrijd aafgelasjt waerdj mer de optocht geit door. Väörop de tróm en vervolges het besjtuur es raod van èllef es ein saort koe koex klen verklèdj. De offisjele kostuums zeen nog óngerwaeg vanoet Hulsberg. Den volgtj de volledige EHBO mit dao achteraan ein paar loslaupendje vastelaovesgekke. De Häörder vastelaovendj is gebaore! Het is in 1955 zoea kaod det de Kouk biej het kastiël is toegevraore. Det is neet echt apaart mer det de sjaatsendje jeugd op ein gegaeve moment eine auto `t ies op zuut rieje mit dao in Prins Ton en ziene raod van èllef, det is waal biezunjer! De nar, dae de raod begeleidj , Wiel Heuyerjans , sjpringtj es eine gek äöver het ies.
Noe nog eine naam verzinne väör die klup. Dae iër kumptj Sjang van Bet ane waeg toe. Es de nuje raod van èllef bie Bet zitj te prakkezére en diskusjére welke naam het mót kriege, zaet Sjang;’ Woearóm numtj gae uch gein Sjaopsköp?’ En zoea is het gekómme. Es taegeprestasie waerdj biej Bet de ‘Sjaopesjtal’ gevestigdj en is dao auch jaore gebleve. Vanaaf noe is d’r eeder jaor 3 daag Vastelaovendj in Häör; zunjig, maondig en dinsdig. In de jaore dao nao greutj de Häörder Vastelaovendj. In 1956 versjientj de iërste vastelaovesgezèt van de Sjaopsköp. In 1957 waerdj ein Vastelaovesvereniging opgerichtj. De raod van èllef en de besjture van de ‘pötte’ (buurtvereniginge) sjlaon de henj in-ein en sjtèlle zich es doel óm in de kómendje jaore de Vastelaovendj in Häör te behaoje en oet te breije. In 1963 waerdj de iërste Jeugdprins oetgerope; Paul 1 (Paul Lemmen) in ’t patronaat woea jeugdvereniging ‘De Instuif’ häöre toeshave haet. Vanaaf ’t begin van de zestiger jaore waere Prins en gevolg op ’t gemèndjehoes óntvange väör de sjläöteläöverdracht. Dees tradisie is doorgegange toet de aansjloeting biej Hale in 1990.
